1Cor 13 | TPZ | STEP | Eöß se keh vavaato me noß a napan pa ma meoh vu to, me o to po ankeroß, ivëhkëk, eöß to hikta iu noß o upöm teß, eöß to teß va noß manih po kamus to tatanih non, keß a përoß to tatanih vaßpuh non.

1 Corinthians 13

1 Eöß se keh vavaato me noß a napan pa ma meoh vu to, me o to po ankeroß, ivëhkëk, eöß to hikta iu noß o upöm teß, eöß to teß va noß manih po kamus to tatanih non, keß a përoß to tatanih vaßpuh non. 2 Eöß se keh vavatvus e noß pa soe vamanih pa teß vanënën soe, ko nat me e noß pa ma kokoman vakoaan pe Sosoenën vaßpeh me a ma meh vu nat, me o vaman kikis va pa soe ke a tope, keß vahuk en pa meh ö. Eöß se keh teß me noß a ma tah poë varih, ivëhkëk, eöß se keh hikta teß me noß a taateß iu teß, eöß kuru a tah akuk. 3 Keöß se keh heß kurus a ma tah peöß manih pa nap arus, me eöß se heß a sionineoß, kee ës manih po suraß, ivëhkëk, a taateß iu teß to hikta teß non manih peöß, eöß hikta se kon noß ta pah tah.

4 A teß to iu rakah non a meh teß, eß to hikta nat non pa heve vëhöß, me a piun a punis nee to nok manih peß. Ahik. Eß to nonok non a taateß vih manih pa napan kurus. Eß to hikta haraß vahat non o teß varih to öt ne a ma tah peo, ko hikta nat non pa kë koman hah a ëhnaneah pa taateß möh. 5 Eß to hikta nat non pa nok vahok, me vatösoe, eß to hikta koman vörep hah a non, eß to hikta nat non pa heve vëhöß ke a meh teß, eß to hikta nat non pa koman a hat, nee to nok manih peß.

6 Eß to vaeö varoe non a taateß soe man, me a vatvus a soe man, ivëhkëk, eß to rës e non pa ma taateß hat. 7 A teß to teß me non a taateß iu manih pa meh teß, ahikta ta pah tah se vöknah poan. Ahik. Eß to anoeh non, ko vaman tamoaan non e Sosoenën se vaßaus poan. Ko poen no a punis se nö ro e maß manih peß, eß se sun vaeh tamoaan e non.

8 A taateß iu a meh teß, eß to hikta se hik non. Ivëhkëk, a ma kiu va pa vatvus a soe vamanih pa teß vanënën soe, ee se hik ee. A ma heß varih pa vaato pa ma meoh to, ee se hik ee. O heß va po nat, eß me se hik en. 9 A pusun in eah ivëh, ea to nat pöh hum ro no a ma tah, me ea to vavatvus pöh hum ro no sih a soe vanënën. 10 Ivëhkëk, amot a tah vih vamaman se tavus maß, ka manih po poen pamëh a ma tah kurus varih na to ep, ko nat no to teß pöh hum ne, ee se hik ee. 11 Eß to vatoe e non pa ö nöß to vavaato vavoh noß, eöß he teß va noß pe koaß, ko kokoman va noß pe koaß, ko nat peöß teß va non manih po nat pe koaß. Ivëhkëk, o poen nöß to apuh eoß, eöß to këh eoß pa ma taateß pe koaß. 12 Eß to vatoe me e non pea kuru, ea to nat pöh hum no a ma tah pe Sosoenën to teß va non manih, pea to ves no po siroak taköh. Ivëhkëk, amot ea se ep rakah ee pa matan e Sosoenën. Ka se nat vavih rakah va in eah manih pa ö neß to nat vavih va ka rora kuru.

13 Ivëh, ka kukön taateß varih to teß tamoaan e ne, a taateß vaman, taateß anoeh e Sosoenën se nok vavih a ra, me a taateß iu pea manih pa meh teß. Ka taateß iu a meh teß, eß a taateß vamomoaan rakah.